कमला पुल १४ वर्षदेखि अधुरो: मधेसको विकासको प्रतीक कि सरकारी उपेक्षाको नमूना?

मनिष यादव भुमिपोष्ट, सिरहा –
गणतन्त्रको यात्रा सुरु भएको झण्डै दुई दशक बितिसक्दा पनि सिरहा जिल्लाको कमला नदीमाथि निर्माणाधीन कमला पुल अझै अधुरो अवस्थामा छ। देशका नीति निर्माताहरूले विकास र समावेशीताको कुरा गरिरहँदा मधेसका नागरिकहरू भने वर्षौंदेखि अधुरो पुल पार गर्दै जोखिमपूर्ण यात्रा गर्न बाध्य छन्।

विकासको नाममा देखिएको उपेक्षा
हुलाकी राजमार्ग अन्तर्गत पर्ने यो पुल सिरहा जिल्लाको सवारी आवागमन र व्यापारिक संजालको मेरुदण्ड मानिन्छ। तर २०६८ सालमा निर्माण कार्य सुरु गरिएको यो पुल १४ वर्ष बितिसक्दा पनि पूर्णरूपमा निर्माण सम्पन्न हुन सकेको छैन। हरेक वर्ष कामको निरीक्षणका नाममा मन्त्रीहरू आउँछन्, तर वास्तविक काम शून्य नै देखिन्छ।

स्थानीयवासी मनिष कुमार यादव भन्छन्, “हामी हरेक वर्ष पुल निर्माण पूरा हुन्छ भन्ने आशामा बस्छौं, तर पानी पर्ने बेलामा यो ठाउँमा यात्रा गर्नु भनेको मृत्युलाई अंगालो हाल्नु जस्तै हो।”

निर्माणको ढिलाइ र सरकारी बेवास्ता
पुलको कामको जिम्मा पाएको निर्माण कम्पनीले बारम्बार म्याद थप गराउँछ, तर कामको गति भने कछुवाको चालभन्दा पनि ढिलो छ। निर्वाचित जनप्रतिनिधि र स्थानीय प्रशासनले पनि यसबारे प्रभावकारी अनुगमन र दबाब सिर्जना गर्न सकेको छैन।

स्थानीय जितेश कर्णका अनुसार, निर्माणको सुरुवाती चरणमा नै गुणस्तरहीन काम, बजेटको अनियमितता, र राजनीतिक हस्तक्षेपले पुलको निर्माणलाई प्रभावित पारेको थियो।

राजनीतिक भ्रमण कि फोटोसुट?
पछिल्ला वर्षहरूमा दर्जनौं पटक मन्त्री, सांसद, र अन्य उच्च पदाधिकारीहरू पुलको ‘अवलोकन’ गर्न आएका छन्। तर जनताको नजरमा ती भ्रमण केवल प्रचारबाजी र फोटोसुटमा सीमित भएका छन्। “हामीले नेताहरूको हेलिकप्टर झर्ने देखेका छौं, तर पुल पूरा भएको कहिल्यै देखेनौं,” स्थानीय युवा अभिनाश पूर्वीले बताए।

पुल अधुरो हुँदा जनजीवन कष्टकर
पुलको निर्माण नपुग्दा वर्षायाममा सवारी साधन मधेशको राजधानी जनकपुर आवतजावत ठप्प हुन्छ। विद्यार्थीहरू, बिरामी बोकेका एम्बुलेन्सहरू, किसानहरू – सबैलाई यो पुलको आवश्यकता छ।

जनता जागरुक नभएसम्म विकास सम्भव छैन
जनताले पटक–पटक आन्दोलन गरे पनि कुनै ठोस परिणाम आएको छैन। अझै दुखको कुरा त के भने, केही जनप्रतिनिधिहरू यही समस्याको समाधान गर्ने सट्टा चुनाव जित्न पुलको मुद्दालाई चुनावी हतियारको रूपमा प्रयोग गर्छन्।

तर यति हुँदाहुँदै पनि भोट हाल्दा ‘दारु र मासु’ लाई प्राथमिकता दिने मतदाताहरूको संख्याले असल प्रतिनिधिको अभाव सिर्जना गरेको छ। जबसम्म मतदाता स्वयं जागरुक भएर योग्य प्रतिनिधि छान्दैन, तबसम्म कमला पुलजस्ता योजनाहरू र मधेशको विकास अधुरै रहनेछन्।

निष्कर्ष
कमला पुल सिरहा र आसपासका जिल्लाका लागि केवल भौतिक संरचना मात्र होइन, यो जनताको सपना, आकांक्षा र अधिकारको प्रतीक हो। १४ वर्षसम्म पनि एक पुल पूरा हुन नसक्नु गणतन्त्रको गहिरो विफलता हो। अब समय आएको छ – मधेसका जनता सचेत बनून्, अधिकारका लागि एकजुट होउन्, अनि विकासको लडाइँ पुनः सुरु गरून्।