सिरहा । नेपाल स्काउट मधेश प्रदेशका नवनियुक्त आयुक्त दिनेश कुमार यादवले मधेश प्रदेशभर स्काउट गतिविधिलाई तेज गरिने बताए । नेपाल स्काउट मधेश प्रदेशको आयुक्तमा नियुक्ति लिँदै त्यस्तो बताएका हुन् ।
विभिन्न प्राविधिक कठिनाईले नेपाल स्काउटको गतिविधि सेलाएको औल्याउदै उनले भने,‘आउने केही महिनाभित्र त्यस्ता गतिविधिलाई तेज गतिमा अगाडि बढाउने छु ।’ संघ, प्रदेश र स्थानीय सरकारसँग समन्वय गरी त्यस्ता कार्यहरुलाई प्राथमिकताका साथ अगाडि बढाउने उनले जनाए ।
विपद् व्यवस्थापन, विपद् जोखिम न्यूनीकरण, सामाजिक क्षेत्रमा अनुकरणीय कार्य, निस्वार्थ सामाजिक सेवाभावको जागृत र अतिरिक्त शैक्षिक क्रियाकलाप जस्ता कार्यहरु नेपाल स्काउटको प्राथमिकताका विषय रहेको उनले प्रष्ट्याए ।
सामाजिक सेवाभावले अगाडि बढ्न चाहेकाहरुलाई विपद् जोखिम न्यूनीकरणसँग सम्बन्धित विषयबारे दक्ष बनाउन उनीहरुको तालिम लगायत अन्य कुराको व्यवस्थापकिय पक्षलाई मजबुद बनाउदै नेपाल स्काउटले आफ्ना कार्य गर्दै आएको उनको तर्क छ ।
स्वंसेवी युवा र विद्यार्थीहरुको चौतर्फी विकासका लागि गोष्ठी, सेमिनार, अन्तक्रिया, छलफल भेला तथा दक्षतासँग सम्बन्धित क्षमता विकासका लागि अन्य क्रियाकलाप नेपाल स्काउटको प्राथमिकताको विषय रहेको उनले थपे ।
गएको केही दिन सिरहा नगरपालिका वडा नं.६ निवासी समाजसेवी दिनेश कुमार यादवले मधेश प्रदेश स्काउटका प्रमुख एवम् खेलकुद तथा समाज कल्याण मन्त्री सुरिता साहबाट आयुक्तको नियुक्त पाएको छ ।
