काठमाडौं । विशेष अदालतले झलनाथ खनाल स्वास्थ्य विज्ञान प्रतिष्ठानमा भ्रष्टचार गरेको आरोपमा ५ जनालाई कैद तथा जरिवानाको सजाय सुनाएको छ ।
गत असार ११ गते विशेष अदालतका अध्यक्ष टेकनारायण कुँवर, तेजनारायणसिंह राई र मुरारीबाबु श्रेष्ठको इजलासले ५ जनालाई दोषी ठहर गर्दै सजाय निर्धारणका लागि आजलाई पेसी तोकेको थियो ।
विशेषले आज ५ जनालाई कैद तथा जरिवानाको सजाय सुनाएको हो । सर्लाहीको लालबन्दीस्थित प्रतिष्ठानका नाममा भ्रष्टाचार गरेको आरोपमा मधेस प्रदेशका तत्कालीन आर्थिक मामिला तथा योजनामन्त्री विजय कुमारलाई सबैभन्दा बढी ९ वर्ष १ महिना कैद तोकिएको छ।
उनलाई कसुरअनुसार ८ वर्ष र पदीय जिम्मेवारीका हिसाबले थप १ वर्ष १ महिना कैद हुने फैसला भएको हो। पूर्वमन्त्री कुमारबाट २ करोड ३५ लाख २९ हजार ३ सय ६८ रूपैयाँ विगो र जरिवाना असुल हुने ठहर पनि अदालतले गरेको छ।
प्रतिष्ठानका अध्यक्ष रेवतीप्रसाद पन्त, महासचिव नवराज भण्डारी, कोषाध्यक्ष निरज भण्डारी र सदस्य देवेन्द्र रायलाई जनही ८ वर्ष कैदको फैसला भएको छ।
उनीहरुबाट पनि २ करोड ३५ लाख २९ हजार ३ सय ६८ रूपैयाँका दरले विगो र जरिवाना असुल्ने फैसला विशेष अदालतले गरेको छ।
सर्लाहीको लालबन्दी नगरपालिकाका पूर्वप्रमुख मानबहादुर र मधेस प्रदेशका तत्कालीन आर्थिक मामिला सचिव प्रेमकुमार श्रेष्ठले सफाइ पाएका छन् ।
