काठमाडौ । नयाँ वर्ष २०८३ को पावन अवसरमा काठमाडौं उपत्यका र यस आसपासका क्षेत्रमा घुम्न जाने योजना बनाउँदै हुनुहुन्छ भने यहाँ धेरै आकर्षक गन्तव्यहरू छन्। छोटो समयमा र कम खर्चमा प्रकृति को आनन्द लिन सकिने केही प्रमुख स्थानहरूको विवरण यहाँ प्रस्तुत छ।
नयाँ वर्ष विशेषः काठमाडौं आसपासका उत्कृष्ट घुमघाम गन्तव्यहरू
१. नगरकोटः
काठमाडौंबाट करिब ३२ किलोमिटर पूर्वमा अवस्थित नगरकोट नयाँ वर्ष मनाउनका लागि सबैभन्दा लोकप्रिय ठाउँ हो। यहाँबाट सगरमाथा, अन्नपूर्ण, गणेश र लाङटाङ लगायतका हिमालहरूको सुन्दर दृश्य देख्न सकिन्छ। विशेषगरी नयाँ वर्षको पहिलो सूर्योदय हेर्न यहाँ ठूलो संख्यामा मानिसहरू पुग्ने गर्छन्।
२. धुलिखेल र नमोबुद्ध
पारिवारिक घुमघामका लागि धुलिखेल उत्कृष्ट छ। यहाँबाट हिमालको दृश्यसँगै जिपलाइनको रोमाञ्चक अनुभव पनि लिन सकिन्छ। धुलिखेलबाट केही अगाडि रहेको धार्मिक स्थल नमोबुद्ध शान्त वातावरण र गुम्बा दर्शनका लागि प्रख्यात छ।
३. सुकुटे
यदि तपाईंलाई साहसिक खेल र ¥याफ्टिङ मनपर्छ भने सिन्धुपाल्चोकको सुकुटे बिच राम्रो विकल्प हो। काठमाडौंबाट करिब ६५ किलोमिटरको दूरीमा रहेको यो ठाउँमा सुनकोशी नदीको किनारमा टेन्टमा बस्ने र ¥याफ्टिङ गर्ने सुविधा छ।
४.भक्तपुरको बिस्केट जात्रा
नयाँ वर्षकै दिन भक्तपुरमा प्रसिद्ध बिस्केट जात्रा सुरु हुन्छ। ऐतिहासिक र सांस्कृतिक उत्सवमा सहभागी हुन चाहनेहरूका लागि भक्तपुर दरबार स्क्वायर र आसपासका क्षेत्रहरू जीवन्त देखिन्छन्। यहाँको नेवारी खाजा र परम्परागत संस्कृतिले नयाँ वर्षलाई विशेष बनाउँछ।
५.चन्द्रागिरी
चन्द्रागिरीः केबलकार चढेर उपत्यकाको पूर्ण दृश्य र हिमाल हेर्न चन्द्रागिरी जान सकिन्छ। यहाँ बालबालिकाहरूका लागि पार्क र बस्नका लागि रिसोर्टको पनि व्यवस्था छ।
६ सुन्दरीजलः पदयात्रा (हाइकिङ) मन पराउनेहरूका लागि सुन्दरीजलबाट चिसापानीसम्मको यात्रा उपयुक्त हुन्छ। यहाँको झरना र शिवपुरी राष्ट्रिय निकुञ्जको प्रकृतिले मन आनन्दित तुल्याउँछ।
नयाँ वर्षको समयमा यी ठाउँहरूमा भीडभाड हुन सक्ने भएकोले होटल र यातायातको अग्रिम बुकिङ गर्नु बुद्धिमानी हुनेछ ।
